حابب اسرق كلمة العملاق محمود المليجي لما كان بيتكلم عن الزمن في فيلم اسكندرية ليه..:) بس هاقولها المرة دي عن زمن التمنيانات والتسعينات :)
..................................
زمن
 ماكانش فيه يوتيوب او فيس بوك او تورنت او نتفيلكس أو ايجي بيست او كورة اون لاين....
زمن الماتشات المحلية والعالمية كانت بتتذاع على القناة التانية من غير أي احتكار ولا بي ان سبورت ولا ابو ظبي الرياضية المشفرة...
زمن ماكانش فيه موبايل ولا تقنيات الــ ثري دي والهولوجرام ، وحتى الكمبيوتر ماكانش عند كل الناس وكانت نسخة ويندوز 95 تعتبر ثورة في عالم السوفت وير!
زمن كنا بنلعب فيه البلي و نوا المشمش وغطيان الأيس كريم والكازوزة
زمن الكورة الشراب وصيادين السمك وقفاشة الملك وكهربا
والبنات كانت بتلعب "أولى" :
أما الألعاب اللي كانت بتعتمد على التكنولوجيا ف يادوب كنا بنلعب أتاري طيرات وموتسكيلات وشكشك Super Mario قبل دخول الفيديو جيم والبلايستيشن وألعاب الواقع الافتراضي..
زمن كنا بنقعد بالساعات نطير طيارة ورق فوق سطوح بيتنا ونشبكها في طيارة ابن الجيران :)
زمن على بساطته وسذاجته..الا انه كان عالم حقيقي..وكانت الصداقة فيه حقيقية بجد..مش مجرد اكونتات على الفيس وتويتر..اللي ممكن الاكونت من دوول يبقى مجرد اكونت وهمي اصلا أو لجان الكترونية :)
زمن كان الوصول للأشياء أصعب مافيش كلام بس الحصول على الأشياء بعد العناء يجعل للأشياء قيمة أعظم!
في زمن التمنينات
والتسعينات..
حيث العالم كان أقل صخبا وأكثر سعادة